Ossi de porco
Ossi de porco? N'alimento san
Che le contempla ormai tute le diete
I fa ben par la prostata,el diabete
E no so quanti mai altri malan
Con el colesterolo po' i va a nosse
Specie se te ghe roseghi ben l'osso
E te ghe meti sora del sal grosso
Ma che sia pronte sempre lì le bosse
Ossi de porco? N'alimento antico
El le smorfiva Cesare a le Galie
Dopo che avea finì le so batalie
Pai legionari l'era un pasto rico
Si insoma i ossi i merita un poema
E nojaltri che semo i so cantori
Emo fato stasera proprio i siori
Emo fato stasera na gran çena
Franco Ravazzin
---
Cavolo o brocolo?
Ci cavolo elo el cavolo?
Elo cusin del brocolo?
Ricordo che el me avolo
Disea "...na scarpa e un socolo"
Iè çerto un po' parenti
Con lori te camini
Però… iè difarenti
Forsi sarà cusini...
Ma mi sto gran dilema
Me lassa un po' perplesso
Me son postà el problema
Però ve lo confesso
Che ancora no capisso
Ndò l'è la difarensa
Anca se me scugnisso
No trovo la sentensa
Ho verto la Treccani
Çercando su sta pianta
Ghera dei nomi strani
E ben çentoçinquanta
Le specie coltivade :
capusso,verza,rapa
iè tute… cavolade
de qua no se ghe scapa!
A dirla fin in fondo
Ghò ancora da capir,
par quanto gira in tondo
par mi la va a finir
che forsi un po' me incavolo
che forsi tiro un mocolo!
No ghò capido un cavolo
No ghò capido un brocolo.
Franco Ravazzin
---
La cusina dei Scaligeri, secondo Dante e secondo mi
Ma, se magnava ben soto la Scala?
Sentendo Dante, par proprio de si
Parchè Cangrande Lu el l'ha definì
Come "primo rifugio e primo ostello"
No voi pensar ch'el n'ha contà na bala
L'era in esilio e l'era sensa schei
Forse lu l'ha magnà "polenta e osei"
S'el dise "...Su la Scala, il santo uccello"
Riferido al Signore de Verona.
Forse el volea "fagioli all'uccelletto"
Il cinghiale, la manza o il c..apretto
E alora, el vero sior, quel de la Scala
(ché Cangrande, no l'era çerto mona)
a lu ch'el se sognaa la ribollita
el ghà servì pearà, quela che pita
L'ebbona... ovvia, maremma maiala!
Po', forse, i ha discusso sora el vin
Dante, cissà, el se spetava un Chianti
Par trar ispirassion par altri canti
Ma Cangrande, che l'era proprio figo
El ghà fato tastar el Bardolin
Po' n'Amaron de la Valpolesela
De quei che fa sognar la camporela
De quei che po' te lassa sensa intrigo
Si insoma, la cusina el l'ha gustà
(e forsi el s'ha ispirà pal Paradiso)
Cangrande, sul caval, col so sorriso
El ghà spiegado la "…diritta via..."
L'ha magnà, l'ha beù e l'ha ciavà
E ne l'esilio l'ha trovado svago
L'ha lassà dissendenti a Gargagnago
E a mi lo spunto par sta poesia…"
Franco Ravazzin
---
A Giovanni Rana
El gh'à fregà le suche ai veronesi
El gh'à fregà el salmon ai norvegesi
L'ha debutà con Marilyn Monroe
L'ha catado al Cremlino Gorbaciov
El ghà contà rosarie ai sete nani
L'è stado un faraon dei egissiani
Dei tortellini l'ha fondà n'impero
Che ormai conosse tuto el mondo intiero
Scominsiando a impastar, prima de sveja
Nel panificio de la so fameja
Par rivar al traguardo che consola:
El tortelin, par tuti, su la tola!
E se stasera el firma sto Registro
Lu che ormai de cusina l'è un ministro
Cressarà ancor de più la so gran fama!
L'era un girin, l'è deventado RANA!
...ma i Paladini, qua, de Cà Montagna
Speta i 'sfogliavelo' a la castagna!
Franco Ravazzin
---
El bacalà
Ch'el sia a la vicentina, mantecato
Ch'el sia bianco, el sia rosso, el sia impanà
Mi digo che a sto mondo no ghè piato
Più bon de la polenta e bacalà
Par questo, provocado nel gargato
Mi meto in rima sta specialità
Che Dante me perdona sto pecato
Decado proprio da golosità
Son sicuro però del so bon ocio
Parchè i golosi lu el te ià cassà
A l'Inferno, la zo, drento nel pocio
Ma l'era pocio bon, de bacalà
L'è un pesse che diria quasi de lusso
Parchè l'è un pesse proprio navigà
El nasse ch'el se ciama anca merlusso
El more ch'el se ciama bacalà
Tiremo in pressia alora via i paneti
Che riva la polenta brustolà
E che in sta gran disfida tra poeti
El vinsa ancora lu: el BACALA'
Franco Ravazzin
---
El kanederlo
…Pensa ti! Stentava a credarlo
ma che bon che l'è el kanederlo
che na olta,pressapoco
l'era un po' el… Papà del Gnoco
Però dopo l'anession
Quando che ha cambià paron
Tuto el Veneto e Venessia
Eco el gnoco che de pressia
Ha slargado la barriera
Con so pare oltre frontiera
I se ghà guardà in cagnesco
El talian con el todesco
Po' però i ha fato pase
E l'è questo che me piase
Gnoco, dai, senti to mare
uto dirghe su a to pare?
Tuti du sì nati infina
Da na mare: la farina
Fasì pase dai de novo
Parchè vostro pare, l'ovo
Dise che, su tuti du
Ghe stà giusto si anca lu!
E mi alora qua me s-gionfo
Col kanederlo in trionfo
Fato ben, belo impastado
Tuto tondo l'è imburado
Con el speck fato a tocheti
O altre spessie che te meti!
...da doman, voj magnar poco
...me consolarò col gnoco!
Franco Ravazzin
